قصيدة كتبها خادم الحرمين الشريفين الملك فهد بن عبدالعزيز آل سعود يرحمه الله عندما كان مريضاً بلندن في شهر شوال من عام 1385هجري، ارسلها للأمير فهد بن سعد آل سعود يرحمه الله، يشكو فيها
قساوة المرض:
يا بو سعد صارت على أخوك غارات
شهرين اقاسي من شديدالغرابيل
سو المرض يحمل على اخوك حملات
مافي يدي حيله ولا في يدي حيل
والله فزع من فوق سبع السماوات
وأنا أحمد الله يوم صارت تساهيل
ماينفع الخايف والايام عجلات
الخوف ماينفع ولا القول والقيل
حنا هل العوجا ولابه مراوات
شرب المصايب مثل شرب الفناجيل
لاشك أنا مشغول في كل الاوقات
على الذي حنـــــــــا بظله رجاجيل
ماني على نفسي كثيرالحسافات
لا سلم راسه روسنا رفاع با لحيل
حامي حمانا بالليالي المخيفات
لو صار بالــــــعالم كثير الزلازيل
فخر العروبه بالعدل والمساواه
هذاك هو فيصل ولا فيه تشكيل
يشهد له اللي شاهدوا منه ليات
ويشهد له التاريخ جيل بعد جيل
ورد الامير فهد بن سعد آل سعود يرحمه الله بالقصيدة التالية:
يامرحبـا بكتـاب زبـن المـخـلات
اهـلا هلابـه عـد وبـل الهماليـل
حمـدت مـن زال الكـدر بالمسـرات
فكاك مـن صكـت عليـه المحابيـل
فـزع لـك اللـي عالـم بالخفـيـات
مبري جروح ايوب غيـث المراميـل
لعل مايزعج علـى فقـدك اصـوات
ولعلهـا لـك يابـو فيصـل تماهيـل
الله يجيرك مـن صواديـف الافـات
عسـاك تسلـم ياعشيـر المشاكـيـل
ماانت برخيـص ياربيـع القرابـات
لو هي بالايدي كان دونـك حلاحيـل
ترا لنا بـك يافتـى الجـود هقـوات
في وقتنا الحاضـر وباللـي مقابيـل
يفـداك ربـع قصـروا بالمهـمـات
اللي علـى القـالات ماتنطـح الشيـل
بعض العرب حي ومن عرض الاموات
مايرتجـي نفعـه بحـل المشاكـيـل
وفيصـل ذرانـا بالسنيـن المخيفـات
هو درعنا الضافي الى ضدنـا الميـل
اللـي نقـل عنـا حمـول ثقـيـلات
راس الحصيـل ان كملـن الحصيـل
اللهم ارحم خادم الحرمين الشريفين الملك فهد بن عبدالعزيز والأمير فهد بن سعد بواسع رحمتك ووالدي وجميع موتى المسلمين.
م. احمد بن علي النزهه الزغيبي
ليست هناك تعليقات:
إرسال تعليق